СДСМ најави политики на социјална заштита што треба да обезбедат сигурност на граѓаните и семејствата и да ги вклучат сите, а не само граѓаните со ниски примања.
„Ќе воведеме Програма за извлекување од сиромаштија, или секое четиричлено семејство кое нема други приходи и живее во сиромаштија ќе добие 12.000 денари. Токму со оваа мерка ќе обезбедиме граѓаните да си ги дозволат основните потреби. Но ќе обезбедиме и други социјални услуги кои ќе одговорат и на другите социјални проблеми на граѓаните“, рече на прес-конференција претседателката на Комисијата за труд и социјална политика на СДСМ, Мила Царовска.
Таа најави воведување семеен социјален работник кој ќе работи на превенција и интервенција во семејството и локалната заедница и оти со решенијата што ги предлагаат социјалните услуги ќе бидат блиски до граѓаните.
Заедно со граѓанскиот сектор, бизнис секторот и општините, додаде таа, ќе обезбедиме центри за поддршка и грижа за стари лица, центри за нега, грижа, вклученост, учество и внимание на лица со попреченост, превенција и заштита од родово базирано насилство и низа други социјални услуги на локално ниво коишто им се јавуваат како потреба на граѓаните коишто се во социјален ризик.
„Конечно, ќе креираме систем којшто ќе се базира на потребите на граѓаните наспроти досегашниот базиран на волјата на поединци во институциите. Македонија е социјална држава по Устав. За нас секој граѓанин е важен и сите граѓани се важни“, рече Царовска.
