Резултатите од анализите од неодамна направени сателитски снимки предизвикуваат загриженост дека Северна Кореја подготвува нов нуклеарен тест или лансирање на далекуцелни ракети, предупредија денес експерти од американско-корејскиот институт „Џон Хопкинс“.
Шпекулациите дека Пјонгјанг подготвува лансирање поврзано е со утрешната прослава од основањето на Работничката партија на Северна Кореја.
Поранешните нуклеарни или ракетни проби често се правени на клучни политички датуми во државата.
Петтата нуклеарна проба минатиот месец е направена на годишнината од оснивањето на Република Северна Кореја.
Последните сателитски снимки се од 1 октомври и на нив се гледаат сандаци на лансирни места, веднаш до ракетните рампи и возила крај магацините со гориво.
„Со оглед на фактот дека лансирната рампа и другите структури кај лансирното место се прекриени, нејасно е дали активностите се поврзани со подготовки за истрелување или можеби други операции.“, велат аналитичари.
