Авторите на британската криминалистичка серија „Шерлок“ од 2010 година, Стивен Мофат и Марк Гејтис, повторно ги здружија силите со цел да направат нов ТВ формат кој ќе ги воодушеви гледачите. Станува збор за адаптација на прочуениот хорор роман „Дракула“, на ирскиот писател Брем Стокер.
Иако работите официјално не почнале, во тек се преговори со Би-Би-Си, каде современата адаптација на детективските приказни за Шерлок Холмс доживеа голем успех.
Извесно е дека ќе се прикажува во форма на мини-серија, а сеуште не е познато кому ќе му припадне главната улога, како ни тоа дали сагата за трансилванискиот гроф ќе биде сместена во модерното време.
Ова ќе биде прва соработка меѓу Мофат и Гејтис после серијата „Шерлок“, чија последна епизода е прикажана во јануари. Заедно работеа и на научнофантастичната серија „Доктор Ху“ во 2005-та. Оригиналната верзија од 1963 година го инспирирала Мофат да почне да пишува. Затоа седнал и продуцирал шест сезони приказни за Докторот, кој патувајќи со вселенскиот брод „Тардис“ го истражува времето и просторот и се бори против непријателите. Британскиот актер Марк Гејтис, освен како Мајкрофт, постариот брат на Шерлок Холмс, го знаеме и по улогите во „Играта на прстените“ и „Табу“. Љубовта кон класичниот хорор филм го „натера“ да се фати за работа и да креира своја приказна.
Делото на ирскиот писател Брем Стокер спаѓа во најдобрите романи на страв и ужас на сите времиња, а ликот на грофот Дракула настана по примерот на влашкиот владетел Цепеш Трети, кој во историјата остана запаметен по суровите методи на борба против Османлиите. Неговата „тесна специјалност“ била набивање на непријателот на кол.
Оваа возбудлива приказна неколку пати е екранизирана. Во филмот од 1958 година главните улоги ги тумачеа Кристофер Ли и Питер Кушинг. Во оној од 1992 година на Гари Олдман му припадна честа да го игра ликот на Дракула, а покрај него играа и Кијану Ривс, Винона Рајдер, Ентони Хопкинс и Моника Белучи. Серијата од 2013 година не оствари поголем успех и беше прикажана само една сезона во „траење“ од 10 епизоди.