Во драмата со забрзана потрага за преживеани после рушењето на нелегално доградената осмокатница во азискиот дел од најголемиот град на Босфорот, Истанбул, после пронаоѓањето на три жртви, настапи момент на чудо и радост кога од под рушевините е извлечено живо петгодишно девојче.
Малата Хава Текгоз е спасена по 18 часа минати под мноштво цигли, бетон и даски.
„Господ е голем!“, викаа насобраните околу носилката на која спасувачите го пренесуваа девојчето кон болницата, на чиј врат имало ставено санитетско помагало.
Петгодишната Хава е спасена недолго откако било спасено и едно деветгодишно дете.
Спасувачите, кои непрекинато работат од моментот кога зградата ненадејно се сруши, до сега извлекоа 12 повредени лица. Тројца од нив се во критична состојба.
Засега не се знае колку точно луѓе се заробени под рушевините од зградата во населбата Картал.
Турскиот министер за урбанизам Мурат Курум им изјави на новинарите дека во моментот на рушењето во одделни станови имало гости. Курум додал дека спасувачките екипи уште „слушаат звуци“, сугерирајќи на тоа дека во рушевините може да има уште преживеани.
Причина за рушењето на зградата со 14 станови во кои живееле 43 лица е предмет на истрага, но властите го истакнуваат фактот дека последните три ката биле нелегално изградени.
Надлежните органи евакуираа седум околни згради, од кои една е во голема опасност и таа да се сруши.
