Со читање транскрипти од СМС-пораки и друга комуникација поврзана со петкратното убиство кај Смилковско Езеро на 12 април 2012 година, денеска во Основниот кривичен суд Скопје продолжи судењето за случајот „Монструм“.
Повеќето од СМС-пораките прочитани на денешното рочиште беа во периодот од 3 до 8 мај 2012 година меѓу тогашните политички функционери.
Целата комуникација е насочена кон тоа како случајот влијае на јавноста со оглед на чувствителноста на темата.
Поранешната министерка за внатрешни работи, Гордана Јанкуловска, во СМС-порака испратена до тогашниот премиер Никола Груевски, на 8 мај 2012 година, се жали дека ДУИ на сите страни ширеле лаги за постапувањето на МВР и дека тоа создавало големи тензии.
Истиот ден серија пораки со слична содржина размениле Груевски и Јанкулоска со Мартин Протуѓер и Илија Димовски.
„Мислам дека некоја организација на жени или МПЦ мора да реагира на ИВЗ, испаѓа дека жените муслиманки дома смеат да чуваат тенкови, а полицијата не им смее ништо” е една од пораките.
Груевски и Јанкулоска „зборуваат“ и за напис од „Плус инфо” каде што било објавено името за заштитениот сведок и дали биле потребни дополнителни мерки за да го заштитат.
Али Ахмети, пак, му напишал на Бујар Османи:
„Зошто се гориш себеси за Монструм. Те видов вчера и ми беше жал, ти не си на голема функција во Влада, зошто не избегна да збориш за тоа”.
Случајот се наоѓа во доказна постапка и се изведуваат СМС-пораки и други транскрипти, предложени како дополнителни докази од Обвинителството.
Судскиот процес го води судијата Огнен Ставрев, а застапници на обвинението се Фатиме Фетаи и Гаврил Бубевски.
За петкратното убиство на 12 април 2012 година, кога беа убиени Кире Тричковски, Филип Славковски, Цветанчо Ацковски, Александар Наќевски и Борче Стефановски, во претходна постапка на доживотен затвор беа осудени Алил Демири, Африм и Агим Исмаиловиќ, Езим и Хаки Азири и Сами Љута.
Врховниот суд во декември 2017 година ги укина пресудите, ги ослободи од притвор осудените Агим Исмаиловиќ, Хаќи Азири, Сами Љута и Фејзи Азири и им определи мерки на претпазливост. По укинувањето на пресудите, случајот „Монструм“ го презеде СЈО и предметот беше вратен на повторно судење.
(ИЗВОР: МИА)