Претседателот на Нигерија, Бола Ахмед Тинубу, свика вонреден самит на шефови на држави и влади на Економската заедница на западноафриканските држави (ЕКОВАС) по повод ситуацијата во Нигер, објавено е на веб-страницата на организацијата.
Самитот ќе се одржи во четврток на 10 август во Абуџа, главниот град на Нигерија.
„За време на самитот, лидерите на Заедницата ќе разговараат за политичката ситуација и неодамнешните случувања во Нигер“, се наведува во соопштението.
Воената хунта во Нигер го затвори воздушниот простор над државата, откако истече ултиматумот на членовите на ЕКОВАС кои најавија употреба на сила доколку соборениот претседател не биде вратен на власт.
Лидерите на западноафриканските земји подготвија план за можна воена интервенција против пучистите кои ја презедоа власта во Нигер, а планот вклучува временска рамка и начин на испраќање војници, објави претставник на Заедницата.
„Регионалниот блок нема да им открие на пучистите кога и каде ќе нападне.
Таа одлука ќе ја донесат шефовите на држави“, изјави Абдел Фатау Муса, комесар за политички прашања, мир и безбедност на ЕКОВАС.
„Сите елементи за каква било можна интервенција се разработени, вклучувајќи ги и потребните ресурси и начинот и времето кога ќе испратиме сили“, додаде Мусах по тридневниот состанок во нигериската престолнина Абуџа.
ЕКОВАС претходно воведе санкции кон Нигер и предупреди дека ќе одобри употреба на сила доколку водачите на хунтата не го вратат соборениот Мохамед Базум на власт до недела.
Економската заедница на западноафриканските држави е организација основана во 1975 година во Лагос која денес обединува 15 западноафрикански земји: Бенин, Буркина Фасо, Кејпвердските острови, Брегот на Слоновата Коска, Гамбија, Гана, Гвинеја, Гвинеја-Бисао, Либерија, Мали, Нигер, Нигерија, Сенегал, Сиера Леоне и Того.
Членките Мали и Буркина Фасо, исто така предводени од пучисти, најавија дека во случај на интервенција на сојузот во Нигер, ќе застанат на страната на пучистите.
(Фото: Ројтерс)
