Сега кога случајот е вратен од почеток, станува неисвесно дали Али Ахмети и Муса Џафери ќе се согласат на ново судење и нивна, нова јавна бламажа во скандалот наречен „Маѓар телеком“
Скопскиот Апелационен суд донел решение со кое ја укинал пресудата којашто за изречена клевета, а по поднесени тужби од Али Ахмети и Муса Џафери, му беше изречена на разузнавачот Слободан Богоевски. Согласно донесената одлука, предметот повторно се враќа во Основниот суд Скопје 2 – Скопје кој, пак, ќе треба да решава во склад со препораките на повисокиот суд.
Случајот со наводната клевета на луѓе од самата врхушка на ДУИ го следат контроверзи од самиот почеток, односно од моментот кога Слободан Богоевски обвини дека Али Ахмети и Муса Џафери се дел од коруптивен скандал кој се поврзува со водечките луѓе на „Маѓар телеком“ и со лицето Димитрис Кондоминас , односно дека овиде двајцата примиле по 2,5 милиони евра, а дека истата сума, наводно, му бил исплатена и на тогашниот премиер на Владата на РМ, Владо Бучковски, но и на екс-директорот на УБК, Сашо Мијалков.
Ахмети и Џафери процениле дека со изјавата на Богоевски тие се наклеветени, а со тужбите наведоа и износ на надомест на штета, од 2,5 односно три милиони денари. Тужителуите, птеку нивните правни застапници наведоа дека нема да ги наплатат бараните суми, бидејќи ним им било важно тоа што ќе се потврдела клеветата.
Тужениот Богоевски за цело време се обидуваше да му објасни на судот дека „спорната“ изјава тој ја дал во својство на сведок на судење во Окружниот суд во Њујорк и дека тој не смее да биде ниту тужен, ниту обвинуван. За бељата да биде поголема, во јавноста беше пласирана информација дека, според распределбата на АКМИС-системот, предметот и бил доделен на судијката Јованка Спировска-Панева, но тој заврши во рацете на нејзиниот колега Нухи Рустеми, кој, пак, во јануари оваа година, случајот го истера со изрекување на првостепената пресуда.
Инаку, американската Комисија за хартии од вредност го отвори за јавноста исказот на Богоевски во постапката што се водеше пред судот во Њујорк за тројцата поранешни менаџери на „Маѓар телеком“: Елек Штрауб, Андраш Балог и Тамаш Марваи, пред судот во Њујорк.
Со прифаќање на парични казни, за Штрауб и Балог, од 250.000 водносно 150.000 долари, всушност, само се потврда дека постоела корупција на високо државно ниво.
„Се потврди сето она што јас го говорев. Би било логично власта, по одлуката на судот во Њујорк, да постапи онака како што треба да постапи, но искрено мислам дека таа ќе се обиде да го затскрие овој случај, поради кој ќе имаме долгорочни последици“, ќе изјави Слободан Богоевски , во април минатата година за „Утрински весник“.
Тогаш Богоевски изрази надеж дека случајот „Маѓар телеком“ и кај нас да добие судска разрешница, но и тоа дека судот ќе ги отфрли приватните тужби на Али Ахмети и Муса Џафери.
Љубиша Станковиќ
