Полската конзервативна владеачка партија ссопшти дека премиерката Беата Шидло поднела оставка и дека на чело на полската влада ќе ја замени сегашниот министер за финансии Матеуш Моравијецки. Тоа го соопшти Беата Мазурек, портпаролката на партијата Право и правда, по завршувањето на состанокот во седиштето на таа партија во Варшава, пренесе АП.
Мазурек навела дека Шидло поднела оставка во текот на состанокот, но дека партиското раководство сака таа да дојде на друга важна позиција во владата, при што портпаролката не прецизирала за која функција станува збор.
Во Варшава со недели се шпекулирало дека лидерот на партијата Јарослав Качински може да следниот премиер, но полските медиуми пишуваа и тоа дека нов шеф на владата би можел да биде и Моравијецки, иако владата на Беата Шидло беше популарна меѓу многу Полјаци, напоменува американската агенција.
Критичарите на полската влада промената ја гледаат како „димна завеса“ за да се сврти вниманието од денешното гласање за законите по пат на кои на владеачката партија би се дале значителни овластувања во правосудниот систем на Полска.
Инаку, Беата Шидло пред три дена објави твит којшто, како што тогаш пренесоа полските медиуми, би можел да го наговести нејзиното заминување од функцијата, имајќи ги во вид шпекулациите во Варшава за можна реконструкција на владата.
„Без оглед на се, Полска е најважна. Таа е таа која се грижи за семејните вредности и која е безбедна, која тргнува од темелните христијански вредности, толерантна и отворена, модерна и амбициозна. Тоа е мојата земја. Пример во Европа и во светот. Тоа е она што ние Полјаците сме“, напиша Шидло во вторникот на својот профил на Твитер.
Пораката, како што пренесува АП, е напишана после состанокот за реконструкција на владата во нејзината конзервативна Партија на правото и правдата.
