„Тезите што сега се покренуваат дека некој нешто договарал со некого за одреден случај, мислам дека се демантираат една по друга или се исклучуваат една од друга. Ако некој со некого се договарал, за што се договарал, да избега или да се врати повторно пред лицето на правдата, кој е тој договор што е правен и со кого бил правен? Никакви договарања нема и нема да има со било кого, а секој еден што носел какви било одлуки спротивни на закон, спротивни на интересите на граѓаните и на државата, треба во секој момент да излезе пред лицето на правдата и да понесе одговорност“, рече министерот за внатрешни работи Оливер Спасовски, како одговор на прашањето од пратеникот Игор Јанушев од ВМРО–ДПМНЕ на денешната собраниска седница во врска со актуелните случувања со Сашо Мијалков.
„Ние и сега покажавме, а и на почетокот кога се отворија постапките, дека правда мора да има за секого во оваа држава без разлика кој е тој и на каква позиција се наоѓа. Никој не избегал од правдата. И ниту еден од тие што правеле каква било штета на граѓаните и на државата, нема да избегне да се соочи со правдата. Во тој дел сите да бидеме на јасно“, потенцираше Спасовски.
Обраќајќи му се лично на Јанушев, миниситерот за внатрешни работипосочи дека кога се зборува за правда, за постапки, за се што се случува околу правдата токму тој бил најдобриот „соговорник“.
„Осомничен сте за криминал од СЈО, а и сега за вас се води постапка во Јавното обвинителство. Другар партиски, по криминал, другар сте по мафијаштво на Груевски и на Мицкоски… И, сега, во кого треба да се има верба. Криминалот и корупцијата се одлика на вашето време. Секогаш крадецот вика држете го крадецот“, изјави Спасовски.
Јанушев во реплика истакна дека е евидентна нервозата кај Спасовски и потенцира дека ниту е осомничен, ниту се води некоја постапка против него.
