Македонската ракометна репрезентација со победа над Тунис од 34:30 стартуваше на 25-то Светско првенство, чиј домаќин е Франција.
Кире Лазаров постигна 12 голови, Стоилов седум, а Манасков пет.
Кај Тунис најефикасни беа Бугами со девет и Теж со седум гола.
Македонија мечот го доби со пресврт во последните 19 минути, кога успеа да ја стигне предноста на противникот од четири гола.
Избраниците на Лино Червар во Мец одиграа тежок натпревар.
Посебно се истакнаа Кире Лазаров, Стојанче Стоилов, Филип Миркуловски и Дејан Манасков
Македонија поведе со 2:0, но Тунис одговори со серија од три гола последователно.
Следуваше период во кој наизменично се постигнуваа голови сé до 18-та минута, кога Македонија се одвои на 10:8.
Одбраните на тунискиот голман Мусауи неговите соиграчи ги претворија во водство од еден гол по првиот дел (13:14).
Македонската репрезентација отвори лошо на стартот на вториот дел.
Лошо функционираше нападот, Тунис постигна три гола и во 36. минута поведе со предност од четири гола (16:20).
Од 41 минута, после 20:24, македонските ракометари ја зедоа работата во свои раце.
Македонија во 47. минута израмни на 25:25, а потоа следуваа четири погодоци во мрежата на Тунижаните, со кои практично беше решен победникот.
