На светските берзи цените на нафтата пораснаа и минатата недела, четврта по ред, поради зголемената загриженост околу недоволната понуда во месеците што доаѓаат и растечките тензии меѓу Русија и Украина, кои би можеле дополнително да ја ограничат понудата.
Цената на барелот на лондонскиот пазар минатата недела се зголеми за 1,2 отсто, на 81,07 долари, додека на американскиот пазар барелот порасна за речиси 2 отсто, на 77,07 долари, што е највисоко ниво од 25 април до сега.
Нафтениот пазар почнува полека да ја засметува во цената заканувачката криза што се наѕира на страната на понудата. Глобалните резерви почнуваат да се намалуваат, а тоа би можело драматично да се забрза во наредните недели. Зголемениот воен ризик, исто така, може да влијае на цените, сметаат аналитичарите.
Русија во петокот, четврти ден по ред, ги ракетираше украинските пристаништа преку кои таа земја извезува храна, што претставува ескалација на напнатоста во тој регион после повлекувањето на Москва од договорот за безбеден поморски коридор, со посредство на Обединетите нации.
Затворањето на житниот коридор може да го загрози снабдувањето со етанол и биогорива кои се мешаат со нафтени деривати во време кога глобалните пазари за жито веќе се стегаат, што ќе предизвика рафинериите да користат повеќе сурова нафта. Запленувањето на бродовите, исто така, може да ги зголеми ризиците за извозот на нафта и други стоки во регионот.
(Фото: Профимедиа)
