Најмалку 10 кубански мигранти загинаа, а 17 се повредени кога камионот кој ги превезувал доживеал несреќа во јужната мексиканска држава Чиапас, соопшти вчера доцна вечерта мексиканскиот институт за мигранти. Меѓу загинатите мигранти има и едно дете.
До несреќата дошло на автопатот Пиџијапан-Тонала во Чиапас, долж брегот на Тихиот Океан, што е вообичаена рута за мигрантите кои преминуваат во Мексико од Гватемала на патот кон Америка.
Возачот на камионот, кој не е наменет за превоз на луѓе, побегнал од местото на несреќата, информираа од Националниот институт за миграција (ИНМ).
„Според првичните извештаи, возачот се движел со голема брзина, изгубил контрола над возилото и се превртел“, се наведува во соопштението на Институтот.
Фотографиите кои ги споделија властите покажуваат дека камион без регистерски таблички се превртел на страна во канал покрај автопатот.
Сите 17 повредени лица се пренесени во болници и моментно се наоѓаат под надзор, јави ИНМ.
Сообраќајните несреќи во кои учествуваат мигранти не се невообичаени во Мексико, каде што многу луѓе ја минуваат земјата до САД во неовластени и лошо одржувани автомобили.
Во декември 2021 година загинаа 54 лица, главно од Централна Америка, кога камионот со кој патувале се преврте во Чиапас.
(Фото: АФП / Профимедиа)
