Судскиот совет на Република Македонија дозволи повторување на постапката против Јордан Митриновски – судија на Апелациониот суд Скопје, по донесена пресуда на Европскиот суд за човекови права во која е констатирана повреда на член 6 од Конвенцијата за заштита на човекови права и основните слободи.
Постапката пред Судскиот совет беше отворена по повеќе од две години од пресудата на Европскиот суд за човекови права, според кој, разрешувањето на Митриновски било спроведено во пристрасна постапка.
Имено, судот во својата пресуда оценува дека Митриновски имал легитимна основа да стравува дека претседателот на Врховниот суд, Јово Вангеловски, бил веќе лично убеден дека тој треба да биде разрешен поради професионална грешка пред да дојде прашањето до Судскиот совет.
Митриновски беше разрешен поради одлуката да го пушти од притвор тутунскиот бос Бајруш Сејдиу со кауција.
Тој тврдеше дека е разрешен по налог на тогашниот министер за правда Михајло Маневски и неговата сопруга Филимена Маневска.
