Апелацискиот суд се очекува во текот на денот да одржи пет седници на кои ќе ги разгледува жалбите што ги поднесоа од Специјалното јавно обвинителство (СЈО), но и обвинетите во нивните предмети.
Покрај денешните, се очекува во текот на целата недела да се одржуваат и други седници.
Жалбите стигнаа до второстепениот суд откако кривичниот совет при Основниот суд Скопје 1, за дел од лицата опфатени во предметите не СЈО ги прифати, за други одби побараните мерки на претпазливост, а за некои пак наместо притвор одлучи да им се одземат пасошите.
Тимот на Катица Јанева ги обжали сите одлуки, меѓу кои и оние со кои без патните исправи останаа Никола Груевски, Миле Јанакиевски, Гордана Јанкуловска, Мартин Протуѓер и Кирил Божиновски. За нив, обвинителите бараат притвор.
Јавни седници во Апелацискиот суд се одржуваа и во текот на претходната недела, се разгледуваа жалбите за поранешниот вицепремиер Владимир Пешевски, екс директорот на Агенцијата за државни патишта, Љупчо Георгиевски, поранешниот помошник министер во МВР, Ѓоко Поповски, новинарите Драган Павловиќ Латас, Ивона Талевска и петмина припадници на полициската специјална единица „Алфи“, меѓу кои и екс началникот Ивица Анчевски – Пуки.
Талевска иако бараше да и биде вратен, остана без пасошот и со обврска да се пријавува во судот една месечно.
Без патна исправа останаа и припадниците на „Алфите“.
