Генералниот секретар на СДСМ Александар Кирацовски соопшти дека таткото на неговата сопруга се повлекол од работното место во Агенцијата за времени вработувања и од Фабриката за опрема и делови во Битола, иако тоа не било поврзано со неговиот ангажман во политиката.
„Ги следиме внимателно реакциите во јавноста и сериозно бараме решенија кои ќе гарантираат ист принцип за сите и морални чекори кои даваат додадена вредност. Искрени сме во тоа. Никој не смее да биде привилигиран, а уште помалку дискриминиран, но чекори мора да се преземат. Побарав таткото на мојата сопруга, Борис Поповски, да го повлече својот анжаман како алатничар и тој прифати. Иако можеби немам право на тоа, затоа што немам ниту поврзаност со неговите ангажмани во животот, соопшти Кирацовски на својот фејсбук профил.
Како што нагласи, привилегии, партизација и непотизам не се и нема да бидат вредности ниту на СДСМ ниту негови. Изрази жалење што таткото на неговата сопруга, како и многу други сограѓани, бил дискриминиран од претходната власт на ВМРО-ДПМНЕ, но сега е време за поинакви вредности и поправедно општество кое создава шанса за сите.
„Од морални причини, таткото на мојата сопруга, кој беше ангажиран времено, на одреден период, преку Агенција за времени вработувања, го откажа својот ангажман во Фабриката за опрема и делови во Битола. И покрај тоа што неговиот ангажман беше сосема легален, легитимен и неповрзан ниту со политика ниту со политичари, додава Кирацовски.
По реакциите во јавноста, претходно оставки на работните места во јавната администрација си дадоа синот на пратеникот Горан Мисовски и мајката на портпаролот на СДСМ Костадин Костадинов.