Американскиот претседател Доналд Трамп изјави дека се согласил да ги одложи царините од 50 отсто на увозот од Европската унија до 9 јули, што е најнов пример за тоа како Трамп најавува воведување царини и предизвикува превирања на пазарите, за подоцна да се откаже од заканата, пренесува CNN.
Трамп рече дека имал „многу убав разговор“ со претседателката на Европската комисија Урсула фон дер Лајен, што довело до одложување. „(Фон дер Лајен) рече дека сака сериозни преговори“, им рече Трамп на новинарите на аеродромот Мористаун во Њу Џерси. „Тој ден би бил 9 јули, тоа е датумот што таа го побара. Таа праша дали можеме да го преместиме од 1 јуни на 9 јули. Се согласив“. „Таа рече дека ќе се сретнеме наскоро и ќе видиме дали можеме да направиме нешто“, додаде тој.
Трамп уште во петокот изјави дека „не бара договор“ со ЕУ и дека царинската стапка ќе биде 50 проценти и ќе стапи на сила на 1 јуни. Таа стапка ќе дојде откако тој објави царина од 20 проценти за увозот од ЕУ во април – што исто така беше одложено, заедно со другите таканаречени реципрочни царини. Неколку минути по разговорот со новинарите, Трамп на Truth Social објави дека „преговорите ќе започнат наскоро“.
Урсула фон дер Лајен претходно во текот на денот на мрежата Х објави дека имала „добар разговор“ со Трамп. „ЕУ и САД ги делат најважните и најблиските трговски односи во светот“, напиша фон дер Лајен. „Европа е подготвена брзо и одлучно да ги започне преговорите, за да постигнеме добар договор, потребен ни е рок до 9 јули.
