Во Париз, жителите и туристите повторно ќе можат да пливаат во Сена од 2025 година, за прв пат по повеќе од 100 години, објави во неделата градоначалничката Ана Хидалго.
Таа наведе три места кои ќе бидат отворени за јавноста, воден центар кој веќе делумно е во употреба, како и уште два други централни капалишта недалеку од Ајфеловата кула.
Местата за капење ќе бидат видливо означени и достапни преку пристаништето. А, ќе бидат обезбедени и соблекувални и тушеви.
Можноста повторно да се капат во Сена е долгогодишна желба на парижани.
Пливањето во Сена официјално е забрането во 1923 година поради лошиот квалитет на водата, но продолжи да се практикува до раните 1960-ти.
Проектот е поттик за Олимписките игри кои ќе се одржат во Париз во 2024 година. Некои од натпреварите во пливање ќе се одржат во Сена.
Во тек се опсежни напори за подобрување на квалитетот на водата. Од управата на градот велат дека веќе инвестирале 1,4 милијарди евра за да ја направат Сена почиста за поширокото подрачје на Париз.
„Ова е долгогодишен сон и е на добар пат конечно да стане реалност“, соопштија од градот.
