Фондацијата „Аполонија“ од Гевгелија и оваа годнина организира Меѓународна ликовна колонија која се одржува по 16-ти пат. На колонијата учествуваат репрезентативни ликови уметници од Македонија, Бугарија, Србија и Грција.
Покрај гевгелиските сликари Драги Хаџи-Николов и Јордан Јанев, учесници од Македонија се и сликарите Ниче Василев, Синиша Кашавалески и Александар Јовановски.
Ацо Ристовски, директорот на Фондацијата Аполонија, истакна дека сликарите во овие десет дена имаат можност да изработуваат дела по сопствен избор, инспирирани од гевгелиското поднебје.
„Престојот на уметниците кои ќе творат во рамките на Ликовната колонија Аполонија во селото Ума ќе биде искористен за создавање традиција, при која во знак на благодарност за гостопримството искажано од жителите на селото, Фондацијата Аполонија секоја година на црквата св.Пантелејмон ќе подарува по една оригинална икона, изработена од ученици во ликовната колонија. Во план е и, во соработка со соодветните институции, да започнат активности поврзани со конзервирање и обновување на фреските во црквата во Ума“, рече Ристовски.
Истите тие дела, според Ристовски, на публиката ќе и бидат презентирани на изложба по затворањето на самата ликовна колонија.
Уметничкиот фотограф, Рајко Р.Каришиќ и овој пат на Фондацијата ќе ѝ остави колекција на фотографии на платно посветени на црквата св. Пантелејмон во селото Ума.
Катерина Ноитси од Грција, пак, на овогодинешното издание на Меѓународната ликовна колонија се претстави со комбинирана техника, со која, со помош на бакарни ливчиња изработи гранка од грозје, библиска билка, препознатлива на овие простори.
Гостинот од Србија, Михаило Глигориќ – Глиша своето уметничко умеење го искажа со трудови изработени со посебна и ретко изведувана ер браш техника.
На колонијата досега учествувале 90 уметници со 300 уметнички дела. Инаку овогодинешната Меѓународна ликовна колонија во Гевгелија која започна на 12 јуни, ќе биде затворена утре, кога Фондацијата Аполонија ќе го прослави своето 10-годишно постоење.
Оваа идеја на организаторите, која е спроведена на дело на најдобар можен начин, е уште еден доказ дека Фондацијата „Аполонија“ постојано е посветена и на останатите сегменти на своето дејствување како општествено одговорна организација која стана препознатлива по спонзорствата и донациите во културата, животната средина, социјалната вклученост, образованието и многу други области.
