Страшен инцидент се случи пред четвртфиналето на Лигата на шампиони, кога бомба е фрлена пред клубскиот автобус на Борусија од Дортмунд, чии играчи оделе кон својот стадион на натпревар со Монако.
Според информациите од клубот „едно лице е повредено“, и тоа во непосредна близина на клубскиот хотел, десетина километри од стадионот, а германските медиуми јавуваат дека во прашање е фудбалерот Марк Батра, кој веднаш бил префрлен во болница.
Батра се здобил со повреди од стаклото кое прснало во негова близина.
Натпреварот поради инцидентот е одложен за утре, 12 април, а ќе почне во 18.45 часот.
Првобитно почетокот на мечот бил планиран за 20.45 часот, што е стандарден термин за Лигата на шампиони.
Клубот од Дортмунд соопшти дека, за сега, нема опасност за публиката која се наоѓа на неговит стадион, а неа ја замоли да остане малку подолго на трибините, или во мир, без паника, да го напушти.
Празнењето на трибините на „Вестфален“ мина без какви било проблеми.
Засега не се познати причините за експлозијата.
