Франција ја зафати бран немири и нереди откако полицаец уби 17-годишно момче кое не го запрело својот автомобил по наредба на сообраќајната полиција.
Смртта на тинејџерот Наел М. предизвика големи протести низ државата, а во предградијата на Париз синоќа беа распоредени дури 2.000 полицајци. Ноќва, таму, насилствата беа посебно изразени.
За нарушување на јавниот ред и мир и за предизвикување материјална штета досега се приведени над 150 лица.
На социјалните мрежи се појавија видеа на кои се гледа како група млади луѓе упаднале во градското собрание во предградието на Лил и палат столици и документи.
„Тоа беше ноќ на неподносливо насилство“, напиша на Твитер министерот за внатрешни работи, Жералд Дерманен, наведувајќи дека целта на толпата насекаде низ државата биле градските собранија, школите и полициските станици.
Најжестоки инциденти се забележани во париското предградие Нантере, каде беше убиен тинејџерот, каде гневни, главно млади луѓе со сите средства ја нападнале полицијата.
Ситуацијата во Нантере, место што е на петнаесетина километри од главниот град, стана тензична околу 23 часот. Групи главно млади лица се судрија со полицијата, при што запалија автомобили и контејнери.
„Тие се повлекоа! Одиме момци, одиме, смрт за полицајците!“, се слушна како вика млад човек, пренесува новинската агенција АФП.
На фасадите на неколку згради се закачени натписите „Правда за Нахел“ и „Полицијата убива“.
Судирите на демонстрантите со полицијата траеле и до 1 час после полноќ, кога припадниците на силите на редот на фрлањето камења кон нив одговориле со солзавец.
Дваесетина општини во Сена-Сент Денис, департман на североисток од Париз, пријавиле пожари, објави полициски извор, додавајќи дека секој пат на местото на настанот биле активни мобилни групи од по стотина луѓе.
Полицијата претходно соопшти дека нешто пред 2 часот по полноќ привела 77 лица, а во Есоне, јужно од Париз, бил запален автобус од кој патниците излегле околу 21 часот, се дознава од полициски извори.
Судири избувнаа и во кварт во Тулуз. Од тоа место се креваше густ црн чад, најверојатно од запален камион.
Тензии беа забележани и во други региони низ земјата, како што е Лион, каде припадниците на полицијата беа гаѓани со пиротехнички средства.
Францускиот претседател, Емануел Макрон, вчера го нарече убиството на тинејџерот „непростливо“, додавајќи дека случајот веднаш ќе биде предаден на судовите како и дека се надева оти правдата „брзо ќе си ја заврши работата“.
„Ништо не ја оправдува смртта на младиот човек. Би сакал да ги изразам чувствата на целата нација за она што се случи и на неговото семејство да му ја упатам нашата солидарност и наклонетоста на нацијата“, рече Макрон.
Се огласи и Елизабет Борн, премиерката на земјата, која изјави дека интервенцијата на полицијата „очигледно не била во согласност со правилата“.
Ова го навлече гневот на полициските синдикати, кои ги обвинија претседателот и премиерката дека донеле пресуда уште пред да се утврди што точно се случило.
Синдикатот на Полицискиот сојуз потсетува дека тие се невини додека не се докаже спротивното, додека „противничката единица“ ПМГ посочува дека политичките интервенции поттикнуваат „омраза кон полицајците“.
По повод смртта на тинејџерот официјалните лица започнаа две одделни истраги – една за убиство кое го извршил полициски службеник, а другата за пропустот на убиениот возач да го запре возилото и за наводен обид за убиство.
Шефот на париската полиција, Лоран Нуњез, изјави за француската телевизија „БФМТ“ дека постапките на полицаецот отвораат прашања, иако тој можеби се плашел за сопствениот живот.
Адвокатот на семејството на жртвата, Јасин Бузру, тврди дека на видеото кое кружи на интернет јасно се гледа како полицаецот ладнокрвно го убива младото момче.
Тој додава дека семејството на убиениот поднело пријава против полицијата поради лажни изјави, односно поради првичното тврдење дека тој со својот автомобил се обидел да ги прегази полицајците.
Друг адвокат кој го застапува семејството, Џенивер Камбла, им изјави на локалните медиуми дека ништо не може да го оправда она што се случило и го опиша неговото страдање како егзекуција.
Францускиот министер за внатрешни работи Жералд Дарманен изјави дека објавената снимка е крајно шокантна. Тој ги повика луѓето „да ја почитуваат тагата на семејството и презумпцијата на невиност на полицијата“.
Жан-Лук Меланшон, лидерот на левицата, изрази сочувство до семејството на тинејџерот.
„Ниту еден полицаец нема право да убива, освен во самоодбрана“, напиша тој на Твитер. Патем, истакна дека неконтролираното дејствување на полицијата го дискредитира авторитетот на државата.
Пред две недели, полицијата уби 19-годишен возач во западниот француски град Ангулем, откако тој, наводно, удрил полицаец во ногата при запирање на сообраќајот.
(Фото: Гети имиџис – АФП)
