Поради штрајкот на собирачите на ѓубре во француската престолнина се натрупаа тони и тони ѓубре.Освен смрдеата, нечистотијата и непријатните глетки, парижаните сега ги мачи уште поголем проблем: потенцијалната наезда на стаорци.
Парижаните стравуваат дека штрајкот на ѓубреџиите, кој започна на 6 март, ќе доведе до тоа стаорци да излезат на улиците и да претставуваат закана за јавното здравје.
Француските чистачи штрајкуваат во знак на протест против контроверзната пензиска реформа на претседателот Емануел Макрон, која има за цел да ја подигне старосната граница за пензионирање од 62 на 65 години.
Последиците од овој план на Макрон се очигледни: 5.600 тони несобран отпад лежеа на улиците на главниот град во понеделникот.
За тоа извести градоначалничката на Париз, Ан Идалго, за тамошната новинска агенција Франс прес.
Француската национална медицинска академија минатиот јули издаде предупредување за заканата што стаорците ја претставуваат по здравјето на луѓето и болестите што тие можат да ги пренесат, откако се покажа дека Париз е еден од најголемите градови во светот со најголем број стаорци.
Во просек, соодносот на стаорци на секој човек што живее во градот е од 1,5 до 1,75.
Проблемот предизвика расправа меѓу градоначалниците на париските окрузи во текот на викендот. Бидејќи штрајкот претставува ризик за јавното здравје, Хидалго е повикана на итна интервенција.
Противниците на Идалго, пак, инаку припадници на француските социјалисти, ја искористија можноста да ја деградираат нејзината политичка позиција.
Спорот ескалираше во неделата вечерта, кога Клеман Беон, министерот за транспорт од центристичката партија на Макрон „Преродба“ – политичар кој воедно цели кон функцијата градоначалник на Париз – ја обвини канцеларијата на градоначалникот за ситуацијата.
„Седми ден без собирање ѓубре. Смрдеа и гнилеж. Пример за неактивност и презир кон Парижаните“, напиша Беон на Твитер во неделата вечер покрај сликите на кои се гледаат контејнери и канти преполни со кеси за ѓубре.
Заменик-градоначалникот, Антоан Жилу, рече дека ако владата навистина е загрижена за Парижаните и Французите, треба да ја повлече „неправедната пензиска реформа“.
Во интервју за француската телевизија, владиниот портпарол, Оливие Веран, го обвини Идалго дека го поддржува штрајкот.
„Каква е пораката што ја испрати градоначалникот на Париз? На неа е да расчисти со парижаните“, рече Веран.
Во екот на штрајковите и протестите, прашање на време е колку долго парижаните ќе останат на своето противење на пензиската реформа, трпејќи го натрупаниот отпад на улиците.
Според локалниот дневен весник „Ле Париз“, штрајкот ќе трае најдоцна до среда.
Сепак, тој би можел да биде продолжен доколку така решат синдикатите. Нивната цел е да штрајкуваат додека владата не ја повлече својата пензиска реформа.
Со серијата гласања во Парламентот закажани за денес и утре, реформата би можела да добие мнозинска поддршка од пратениците и да биде усвоена до крајот на неделата.
