Американскиот заменик помошникот државен секретар на САД за Европа и Евроазија Хојт Брајан Ји ги почна средбите со претставници на политичките партии.
Тој прво се сретна со лидерот на ДУИ, Али Ахмети.
„Поддршката на новиот спикер од страна на САД и ЕУ значи дека Трајко Вељаноски повеќе не е претседател на Собранието“, рече претседателот на ДУИ, Али Ахмети по средбата со Хојт Ји, при што се заблагодари до меѓународната заедница на поддршката за Талат Џафери и негово признавање.
Генералниот секретар на Движење за реформи на ДПА Арбен Таравари и пратеникот на Алијансата за Албанци и претседателот на НДП Весел Мехмеди на средбата со заменикот државниот секретар на САД, Хојт Брајан Ји разговарале за политичката ситуација во земјата.
Претставниците на двете партии , како што соопштија, го информирале Хојт Брајан Ји и за настани кои се случија во Собранието на Р.Македонија, како и здравствената состојба на лидерот на Движење за реформи на ДПА Зиадин Села.
Хојт Ји , бил информиран и за придонесот на Алијансата за Албанците и нивните пратеници, за надминување на политичката ситуација, како и политичка поддршка на Алијансата за Албанците за деблокирање на институции кои се резултат на изборот на претседателот на Собранието на Република Македонија и подготвеноста на Алијансата за Албанците да се формира што е можно поскоро, новата реформистичка Влада од парламентарно мнозинство.
Претходно од американската амбасада во Македонија соопштија дека заменик помошникот државен секретар на САД за Европа и Евроазија Ји ќе се сретне и со претставниците на Беса Билал Касами, со Весел Мемеди од Алијансата на Албанците и со Мендух Тачи лидерот на ДПА.
Најавената средба со Талат Џафери, кого мнозинството во четвртокот го избра за претседател на Собранието, ќе се одржи утре наутро.
Амбасадата на САД уште вечерта додека се случуваа насилствата во Собранието, а и Стејт Департментот ден подоцна соопштија дека ќе соработуваат со новоизбраниот спикер во парламентот.
Брајан Ји утре попладне ќе разговара со претседателот на СДСМ Зоран Заев, а според очекувањата утре ќе биде и средбата со претседателот на ВМРО-ДПМНЕ Никола Груевски.
Во рамки на дводневната посета тој ќе се сретне и со претседателот на државата Ѓорге Иванов, кој иако има преполна агенда најде време за високиот американски дипломат.
