Цените на суровата нафта утрово забележаа нагол раст, достигнувајќи ги највисоките нивоа неделава. Меѓународниот стандард „Брент“ се тргува по цена од 109,58 долари за барел, што е значителен скок во однос на вчерашните 103,87 долари.
Пазарите реагираат со нервоза по одлуката на американскиот претседател Доналд Трамп да го продолжи рокот за Иран за отворање на Ормутскиот теснец за уште 10 дена. Иако Трамп тврди дека преговорите одат добро, трговците стравуваат дека ова одложување всушност значи долготрајна блокада на клучната нафтена рута.
Дополнителен притисок врз цената извршија и информациите на „Волстрит џурнал“:
„Пентагон размислува за испраќање на дополнителни 10.000 војници на Блискиот Исток за да му овозможи на претседателот Трамп повеќе воени опции додека траат преговорите со Техеран.“
Стратезите од „Дојче Банк“ предупредуваат дека иако секој знак за дијалог е позитивен, инвеститорите мора да бидат подготвени за можна натамошна ескалација која дополнително би ја поскапила нафтата.
