Свештениците во Полска организирале забава со вијагра и машка проститутка, а кога работите излегле од контрола морале да повикаат Итна медицинска помош, но дошла и полиција.Се почнало кога машка проститутка изгубила свест.Црквата призна дека инцидентот се случил, а обвинителството најави истрага.
Минатата недела, Газета Виборча, водечкиот полски либерален дневен весник, објави дека свештениците во Даброва Горница, град на југот од Полска, организирале забава во зграда што и припаѓа на бискупијата и на која била поканета машка проститутка.
„Настанот беше од чисто сексуална природа. Неговите учесници земаа лекови за подобрување на потенцијата“, изјавил неименуван извор.
Но, забавата излегла од контрола, а машката проститутка изгубила свест, поради што била потребна медицинска помош.
Меѓутоа, кога пристигнале лекарите, им бил забранет влезот во просториите. Итната помош, како што се наведува, тогаш повикала полиција, која им помогнала да стигнат до унесреќениот човек.
Портпаролот на локалното обвинителство изјави дека е отворена истрага за евентуално неукажување помош на лице чие здравје е загрозено, што е кривично дело за кое може да биде изречена казна до три години затвор.
Настаните потоа добиле дополнителен драматичен тек.
Во четвртокот вечерта некој ја запалил вратата од базиликата во близина на местото каде што наводно се случил инцидентот. Пожарникарите го изгаснале огнот, а повредени немало.
Полицијата подоцна приведе маж осомничен дека го подметнал пожарот.
Во петокот црквата соопшти дека свештеникот во чиј стан се случил инцидентот е разрешен од сите црковни должности „додека не се разјаснат работите“.
После скандалот, бискупот објави писмо во кое се извинува за неодамнешните „болни случувања“ и срамотните свештеници кои биле вмешани, но не изнесе никакви детали за тоа што се случило.
„Им се извинувам на сите кои беа погодени и ожалостени, или дури и скандализирани од ситуацијата“, напиша бискупот и додаде: „Секој што ќе биде прогласен за виновен ќе биде казнет според канонското право, без оглед на пресудата на граѓанскиот суд“.
(Фото: Илустрација / Гети Имиџис)
