Лидерите на земјите од Г-20 подготвија заедничка изјава според која денешницата не смее да биде ера на војна. Дополнително, во подготвениот нацрт на коминикето, највлијателните светски дипломати ја осудуваат заканата од употреба на нуклеарно оружје. Овие политички пораки од најмоќните земји во светот досега се најсилниот координиран меѓународен притисок на Русија, за прекин на воените операции во Украина, но и врз Кина, која дава тивка поддршка на воениот поход на Москва.
Според извори блиски до неколку делегации на состанокот на Г-20 на Бали, нацрт-заедничката изјава има посебна тежина бидејќи е подготвена по неколкудневни преговори меѓу претставници на западните земји со Русија и Кина. Една од пораките на заедничката изјава гласи:
„Заканата од употреба на нуклеарно оружје е неприфатлива. Мирното решавање на конфликтите, напорите за решавање на кризите, како и дипломатијата и дијалогот, се од витално значење. Денешната ера не смее да биде ера на војна“.
Пред да се постигне начелен договор за заедничката изјава, официјалните лица кои ја подготвуваа стравуваа дека тоа би можело да биде прва заедничка изјава што нема да биде прифатена заради противењето на Москва, а можеби и на Кина. Сепак, лидерите на Г-20 допрва треба да потпишат заедничко соопштение.
Г-20 усвои став кој покажува дека руското војување има негативно влијание врз луѓето насекаде, без разлика дали живеат во голема или мала земја.
Индиската делегација одигра клучна улога во усогласувањето на заедничката изјава во која постигнаа консензус за критика на руската инвазија. Во основа, подготвената изјава ја повторува претходната изјава на индискиот премиер Моди, кој во септември му рече на Путин дека „сега не е време за војна“.
Индонезиските власти предупредија дека текстот на заедничката изјава сè уште е подложен на промена.
Украинскиот претседател Зеленски порачува дека евентуалното противење на Русија на оваа мировна формула ќе покаже дека тие сакаат војна, а не мир. Зеленски се обрати пред групата Г-19.
Нацрт-формулата содржи и предупредување дека војната во Украина „го ограничува растот, ја зголемува инфлацијата, ги прекинува ланците за снабдување, ја зголемува енергетската и прехранбената несигурност, како и ризиците за финансиската стабилност“.
Индонезискиот премиер, Џоко Видодо, ги предупреди колегите шефови на држави:
„Ако оваа војна не престане, ќе ни биде тешко да преземеме одговорност за иднината.“
Кинескиот претседател Џи беше претрпе досега најостри критики заради неговото одбивање да ја осуди руската инвазија на Украина, како и заради тоа што не ги искористи своите блиски односи со Путин за да го убеди да стави крај на војната.
Џи се состана со Макрон и порача дека се надева оти Европската унија ќе ја следи независната политика кон Кина, што е одек на претходните изјави на германскиот канцелар Олаф Шолц.
(Извор: „Јутарњи лист“ / Фото: АФП)
