Легализацијата на дивоградбите во Република Северна Македонија мора да престане, особено на начинот што досега се одвиваше, начин што за сите единици на локалната самоуправа предизвикуваше само проблеми, товари и давачки.
Управниот одбор на ЗЕЛС денеска донесе заклучок да формира посебна работна комисија која, заедно со Министерството за транспорт и врски, ќе работи на наоѓање законско решение по можност во сегашната законска регулатива за бесправно изградените објекти да бидат внесени во правниот систем на тој начин што покрај потребните комуналии што ги плаќа секој граѓанин или правен субјект, да платат и дополнителни пенали, односно казни.
„Дали тоа ќе биде преточено во законски текст на постојните законски решенија или во посебен закон ќе биде предмет на работа и на усогласување на ставовите со Министерството за транспорт и врски, изјави претседателот на ЗЕЛС и градоначалник на Скопје, Петре Шилегов.
Одговарајќи на новинарско прашање, Шилегов рече дека интерес на општините е да престане легализацијата на дивоградбите што досега се одвиваше за едно евро по квадратен метар, а оној што има бесправно изграден објект мора да ги плати комуналиите како што ги плаќа секој граѓанин и да плати соодветни пенали и казна за сопствената бесправна изграденост.
„Ние под правичност подразбираме изедначување на луѓето кои ги почитувале законските прописи и плаќање казна за оние што не ги почитувале законските прописи, а не да бидат подредени граѓаните кои редовно си ги намирувале давачките наспроти оние што влегувале во свесно кршење на законот, рече Шилегов.
Тој додаде дека е важно да се најде решение што нема да креира само обврски за општините, туку напротив, ќе им даде и определени права.
Најави дека најбрзо што е можно ќе стапат во контакт со Министерството за транспорт и врски со цел да биде најдено вакво решение.
Според податоците со кои располага ЗЕЛС, во нашата држава има над 70 илјади индивидуални и деловни објекти што сè уште не се во регулиран правен промет.
