Тела на седум лица, меѓу кои и на две исчезнати тинејџерки и осуден сексуален престапник, беа пронајдени во понеделникот попладне на имот во близина на малиот град Хенриета, Оклахома, објави окружниот шериф.
„Телата, за кои се верува дека се 14-годишната Ајви Вебстер и 16-годишната Британи Бруер, биле пронајдени кога полицајците го пребарале имотот каде живеел сексуалниот престапник Џеси Мекфејден“, изјави на прес-конференција шерифот на округот Окмулџи, Еди Рајс.
„Другите тела најверојатно се телата на Мекфејден и членовите на неговото семејство“, рече Рајс, истакнувајќи дека ниту една од жртвите сè уште не е официјално идентификувана од страна на истражителителите.
Округот претходно вчера издаде предупредување во кое се наведуваше дека двајца тинејџери се исчезнати, но истото беше повлечено откако беа пронајдени телата.
„Нашите срца се со семејствата и пријателите, соучениците и сите останати. Ова е трагедија“, рече Рајс.
Рајс истакна дека полицајците пристигнале околу 15 часот по локално време за да го пребараат имотот и ги пронашле телата.
Телевизиската станица КОТВ објави дека Британи Брејер отишла да помине викенд со семејството Мекфаден, повикувајќи се на нејзиниот татко Нејтан Брејер.
Требало да се врати дома во недела навечер, но никогаш не стигнала.
„Британи беше отворена личност. Беше избрана да биде ‘Госпоѓица Хенриет’ која во јули ќе оди на Националниот натпревар за мис во Тулса, а сега нема да успее бидејќи е мртва. Ја нема“, изјави татко и.
На триесет и деветгодишниот Мекфејден вчера требаше да му се суди за користење мобилен телефон, додека бил во затвор, за испраќање сексуални пораки на тинејџерка, објави телевизијата.
Регистарот на сексуални престапници во Оклахома покажува дека Џеси Ли Мекфејден живее на адресата каде што се пронајдени телата.
Во 2003 година беше осуден за силување во Оклахома.
Џералд Дејвидсон, портпарол на Државното биро за истраги во Оклахома, рече дека едно лице вчера ѝ кажало на оперативната група за насилен криминал во Бирото на окружниот јавен обвинител на округот Окмулџи, дека двете девојки можеби се на имот во близина на Хенриета.
„Замениците на Шерифот двапати излегле на лице место. Првиот пат со никого не стапиле во контакт, но при втората посета откриле докази кои ги доведоа до телата“, изјави Дејвидсон.
