Воздухот во североисточниот дел на Соединетите Американски Држави во четвртокот повторно беше силно загаден поради чадот од пожарите кои моментално беснеат во Канада, предизвикувајќи здравствена загриженост за десетици милиони Американци.
Ваквото атмосферско загадување, какво што ретко се гледа, ја зафати областа од Илиноис на север до Јужна Каролина, и направи проблеми на здравјето на децата и постарите лица, и на луѓето со срцеви и респираторни проблеми.
Генералниот секретар на ОН и еколошките организации ја нагласуваат потребата од борба против климатските промени, кои го зголемуваат ризикот од пожари.
Пожарите оваа година започнаа рано во Квебек, а нивниот чад оди право на југ, заради метеоролошките услови.
„Никогаш не сум видела вакво нешто“, рече Линда Хулиано (65), земајќи една од милионите маски кои вчера им се делеа на жителите на Њујорк.
„Тешко ми е да дишам, бидејќи боледувам од астма“, се пожали, оценувајќи дека ситуацијата „предизвикува вознемиреност“.
„Ме потсетува на 11 септември, кога небото беше покриено со чад“, изјави таа за „АФП“.
Невообичаени фотографии од Њујорк во портокалова светлина се на насловните страници на сите весници, иако во четвртокот наутро небото беше малку посветло.
„Виолетово“ предупредување во Вашингтон
Во Вашингтон ситуацијата е полоша од вчера, а предупредувањето за квалитетот на воздухот е сменето од „црвено“ во „виолетово“.
Ова ниво на загаденост е оценето како „многу штетно за здравјето“, според скалата што ја користи Американската агенција за заштита на животната средина (ЕПА).
Децата во државните училишта во Вашингтон, втор ден по ред, имаат физичко во сала, надворешните активности се откажани.
Сите летови за Филаделфија до пладне беа откажани, но сообраќајот подоцна се нормализира, соопшти американската Агенција за цивилно воздухопловство (ФАА).
И аеродромите во Њујорк бележаа доцнења поради слабата и лоша видливост.
Климатските промени го зголемуваат ризикот од пожари и нивниот интензитет.
Зголемувањето на температурата, почестите топлотни бранови и намалената количина на врнежи на некои места се совршена основа за нивниот развој.
Во средата, генералниот секретар на Обединетите нации, Антонио Гутереш, објави на Твитер фотографија од затемнета глетка од седиштето на организацијата во Њујорк.
„Мораме да се помириме со природата“, напиша тој, нагласувајќи ја „итната потреба да се намали ризикот од пожари“.
Во Квебек доаѓа помош од надвор
Речиси 800.000 хектари земја изгореа во Квебек, соопштија властите.
Двојно повеќе пожари се пријавени од јануари досега во споредба со просекот во тоа време во последните десет години.
Во четвртокот во таа франкофонска покраина имаше повеќе од 150 активни пожари, од кои речиси 90 беа надвор од контрола.
Во наредните часови и денови се очекува да пристигнат дополнителни засилувања – американски, француски и португалски противпожарни екипи.
Повеќе од 12.000 луѓе беа евакуирани за неколку дена.
Опасноста од нови пожари се уште е голема.
Квалитетот на воздухот вчера беше многу лош и во Торонто, а експертите предвидуваат дека ќе достигне ниво опасно за населението.
(Фото: АФП / Леонардо Муњоз)
