Социјалдемократскиот сојуз на Македонија ги обвинија денеска министерот Никола Тодоров и ВМРО-ДПМНЕ за уште еден сериозен скандал во здравството во којшто во ризик бил доведен животот на едно неколкумесечно бебе.

Заради дефект од дотраеност возилото на Итната помош од Охрид во кое се превезувало бебе со сериозни здравствени проблеми запрело на превојот Стража, а малиот пациент еден час потоа бил префрлен во друго амбулантно возило.

„Новите 69 возила за Итната помош, до коишто се сликаше Никола Тодоров, што ги чинат граѓаните 4.5 милиони евра, немаат приклучок за инкубатор за бебиња, заради што бебињата за кои е неопходна инта интервенција се превезуваат со стари возила на Итната помош коишто често се расипуваат“, обвинуваат од СДСМ.

Социјалдемократите велат дека се расипувале и новите возила, поради нередовно одржување.

„Тодоров, Груевски и нивните соработници наштетија на граѓаните и го доведоа во ризик нивното здравје“, децидни се од СДСМ.

Во Програмата на новата реформска влада, велат од таму, здравјето на граѓаните е врвен приорритет, а во врска со Итната помош, ќе основале нова самостојна јавна здравствена установа којашто ќе ги обедини сите служби на итна медицинска помош и ќе ги поврзува сите болници во Република Македонија.