Советот на Општина Велес донесе сет мерки за намалување на загадувањето на воздухот во општината за периодот од 2018 до 2022, како составен дел од Планот за квалитет на воздухот.
Првата мерка е да се информираат правните и физички лица дека користењето на несоодветни и опасни материи – гуми, пластика, делови од мебел, масло од автомобил со нив е забрането да ги греат своите домаќинства и деловни и работни простории.
Втората мерка е забрана за палење оган на отворено, на контејнери и на стрништа, а пак трета е забраната за трговските и угостителски објекти доставување и однесување на стока до објектите надвор од одредениот режим.
Домаќинствата и колективните станбени згради и јавни установи се должни да вршат редовно чистење на оџаците, а ЈКП „Дервен“ редовно да ги мие улиците и тротоарите во вонредни околности – при зголемено аерозагадување.
Дополнително се препорачува граѓаните да користат јавен превоз и едно возило за повеќе лица.
Општина Велес во рамки на спроведувањето на мерките ќе дистрибуира летоци со содржини за начинот на користење на ложиштата и складирање на огревниот материјал, ќе врши ефективна контрола на загадувањето и по пријава од страна на граѓаните, а полицијата се задолжува да врши почесто регулирање на сообраќајот на главните сообраќајници и дополнителен технички преглед, посебно тешките товарни возила.
Иако последниве 14 години Велес не е најзагаден град во земјава, загадувањето на воздухот сеуште постои од депонијата на згур, која е последица на тридецениското работење на Топилницата, но и од загадувањето од возилата, како и загадувањето од оџаците од домаќинствата и фабриките поради несовесно користење на несоодветни горива за затоплување на објектите.
