Германската економија веројатно порасна во првите три месеци благодарение на закрепнувањето на индустриското производство, соопшти вчера германската централна банка.
Во својот редовен месечен извештај Бундесбанк ја ревидираше својата проекција од пред еден месец, која предвидуваше благ пад на економската активност во првите три месеци од годинава.
Најголемата економија во еврозоната се мачеше во поголемиот дел од минатата година, затоа што вртоглавото зголемување на цените на енергијата влијаеше врз нејзиниот огромен индустриски сектор, но скромното закрепнување е во тек откако поефтини гасот, поддржувајќи ги надежите дека рецесија може да се избегне.
„На германската економија во првите три месеци од годинава и одеше подобро отколку што се очекуваше пред еден месец и активноста веројатно повторно благо ќе се зголеми“, објави Бундесбанк.
„Индустријата закрепна посилно од очекуваното“, соопшти централната банка.
Благиот оптимизам на банката е во согласност со низата податоци од неодамнешните истражувања кои укажуваат на благо закрепнување на економијата после падот на активноста за 0,4 отсто во четвртиот квартал од 2022 година.
Падот на цените на гасот ги поддржа енергетски интензивните индустрии, а тесните грла во набавката продолжија да се намалуваат, побарувачката за автомобили се зголеми, а градежниот сектор исто така доби поттик, иако делумно поради поповолните временски услови.
Индустриските нарачки, исто така, во последно време пораснаа, што може да укаже дека побарувачката за индустриски стоки го поминала најниското ниво од циклусот, наведуваат од банката.
Високата вработеност, според очекувањата, треба да продолжи да ја поддржува потрошувачката, а невработеноста веројатно следниот месец ќе падне малку, додаваат од централната банка.
