Скопјаните со галичко потекло, Тања Чаловска и Бошко Лепчевски, ќе бидат младоженци на „Галичка свадба 2017“ која ќе одржува овој викенд. Триесет и едногодишниот правник и 28-годишната економистка се запознале пред седум години токму во Галичник каде што утре ќе бидат и венчани во црквата „Св. Петар и Павле“.
По подолго време се случува на Галичка свадба свајцата младенци да имаат потекло од Галичник. Свадбарските обичаи им се познати зошто со нивните родители секое лето учестувале на оваа манифестација.
„Веќе 15 години учествував на Галичката свадба и имав желба да бидам невеста. Остварувањето на мојот сон е тоа што ќе ја продолжам традицијата на моите предци“, рече на прес-конференцијата, Чаловска, која на свадбата ќе носи фамилијарна носија стара еден век и необлечена повеќе од 50 години. Носијата сосе историски вредниот накит што ќе ги носи ќе тежат околу 25 килограми.
Младоженецот Лепчевски, исто така, нагласи дека е задоволство и чест да се продолжи вековната традиција на обичаи и песно, како што рече, едно библиско место како што е Галичник.
Свадбата ќе почне вечер во 19:30 часот, со китење, редење на бајракот и фрлање пушка, а утре наутро во 9 часот ќе продолжат обичаите меѓу кои централен настан ќе биде нивната венчавка во црквата „Св. Петар и Павле“.
Александар Костиќ, претседател на Месната заедница Галичник, соопшти дека на свадбата ќе учествуваат 150 лица облечени во галички носии, ќе има десетици коњи, а свадбарските обичаи и ора, меѓу кои и „Тешкото“, ќе се одржуваат во автентични куќи и на повеќе од десет локации на оддалеченост од 2-3 километри.
„Во недела, 16 јули, во Галичник очекуваме повеќе илјади туристи. Ќе биде организиран посебен собраќаен режим. Посетителите своите возила ќе може да ги оставаат фудбалското игралиште близу Галичник, а потоа со организиран превоз со комбиња ќе бидат превезени до влезот на Галичник“, рече Костиќ.
Со Галичката свадба ќе биде отворено и годишното Галичко културно лето, во чии рамки се 24. Галичка книжена колинија во организација на Здружението „Галикул“ на која ќе учествуваат домашни и странски писатели, како и 28. Галичка ликовна колонија на која гости ќе бидат осум учесници од Израел, Индија, Босна и Херцеговина, Македонија, Словенија, Косово и Бугарија.
Галичката свадба е поддржана од Министерството за култура. Таа е своевиден театар на отворено, а ја слави и чува традицијата од минатото поврзана со Петровден и свадбите кои на тој празник ги правеле печалбарите од мијачкиот крај.
