Сања Лукаревска од денес и официјално е нова директорка на Управата за јавни приходи.
Лукаревска доаѓа на местото на досегашната директорка Анастасија Илиеска.
По повод примопредавањето на должноста, Лукаревска и Илиеска денеска остварија средба.
На средбата, како што соопштуваат од Управата, се разговарало за тековните проблеми, предизвиците за даночната администрација, модернизација и даночните реформи.
„Да се биде директор на УЈП и да се управува со даночната администрација е предизвик и голема одговорност за секој даночник. Со моето долгогодишно искуство во Управата ќе одговорам во целост на обврската. Ова е институција која треба да обезбеди праведно и ефикасно собирање на даноците, и истовремено да го сервисира стопанството и да обезбеди висок квалитет на услуги на сите граѓани“ изјави Лукаревска.
Таа потенцира дека нејзиното делување и посветеност ќе биде во насока на натамошно остварување на мисијата и визијата на Управата, но и кон нов квалитет на даночните реформи засновани на зголемување на транспарентноста, активна и неселективна борба против неплаќачите на данок, поедноставување на постапките за пријавување и плаќање на даноците и унапредување на професијата даночник.
