Регионалната АБА лига од следната сезона ќе брои 12 наместо досегашните 14 клубови, одлучи Собранието на регионалното натпреварување кое се одржа денеска.
Црна Гора и Србија го заджаа истиот број учесници, два односно четири, Хрватска ќе има три претставника, а Словенија, БиХ и Македонија за следната сезона во АБА лигата ќе дадат по еден клуб.
„Во насока на јакнење на квалитетот на натпреварувањето, но и поради деликатноста околу календарот, со мнозинство гласови Собранието на АБА лигата одлучи во сезоната 2017/18 да учествуваат 12 клубови. Анализирајќи ја актуелната ситуација во Европа и во регионот, како и позицијата дека и понатаму не постои признавање на национални сојузи, а со цел да се заштити интересот на основачот на АБА лигата, право на настап ќе имаат клубовите кои настапуваа во натпреварувачката 2016/17, при што приоритет имаат клубовите основачи на лигата, почитувајќи ја поделбата според државите“, се наведува во соопштението на Собранието на регионалното натпреварување.
Во склад со овие одлуки, учесници во АБА лигата во сезоната 2017/18 се: Цедевита, Задар, Цибона, Олимпија, Игокеа, Будуќност, МЗТ Скопје и Морнар, додека останатите четири места од Србија ќе бидат одредени врз основа на пласманот во српската кошаркарска лига.
Донесена е и одлука да се игра и Суперкуп во Бар и да се организираат турнири за играчи до 19 години, со оценка дека заради развој на кошарката во регионот „неопходно е во што е можно покус рок“ да се основа втора Јадранска лига.
„На овој проект ќе се работи интензивно, со желба во неговата реализација да учествуваат сите кошаркарски субјекти. Во склад со тоа, ќе бидат направени разговори со заинтересираните клубови. Собранието на АБА лигата, исто така, смета дека е потребно во најкраток можен рок да се направат состаноци со националните сојузи, за да се надмине моменталната ситуација која не е во интерес за натамошниот развој на кошарката во регионот“, се наведува во соопштението.
