Претседателот на СДСМ, Зоран Заев се сретна со шефот на НАТО канцеларијата во Македонија, Горазд Бартол.
Тема на разговорот бил процесот на формирање на новаата Влада во Македонија и потребните реформски процеси за да се отворат перспективите кон ЕУ и НАТО.
Заев на средбата истакнал дека приоритет на новата реформска Влада ќе биде членството во НАТО, соопштуваат од СДСМ.
Тој, се наведува во соопштението од партијата, објаснил дека фокусот кон евро-атланските перспективи ќе обезбеди стабилизирање на Македонија, работа за домашните фирми и реални странски инвестиции, со што ќе се кренат животниот стандард, платите на граѓаните и ќе се отворат нови работни места.
Претседателот на СДСМ, исто така, посочил дека програма на новата Влада била посветена на економски напредок на граѓаните во Македонија, едно општество за сите граѓани.
На средбата Заев и Бартол оцениле дека е од голема важност демократскиот развој на Република Македонија и било изразено очекување дека Македонија ќе се развива по тој пат.
„Имаме парламентарно мнозинство од 67 пратеници, кое што има, не само право, туку и обврска да избере претседател на Собранието и да овозможи да се формира новата Влада, согласно волјата на околу 700.000 граѓани. Затоа, очекуваме во брзо време да биде избран новиот собраниски претседател, кој ќе го извести претседателот Иванов дека е должен да го даде мандатот, а потоа ќе се пристапи и кон формирањето нова Влада“, го информирал Заев шефот на НАТО во Македонија, Горазд Бартол.
„Честитајки му го 4 април, денот на НАТО, претседателот на СДСМ додаде дека новата Влада ќе биде силно посветена на реформите, како од НАТО агендата, за поголем буџет на одбраната, така и кон обезбедувањето правна држава, независно судство и развој на Македонија во фактор на стабилност во регионот“, стои во соопштението од СДСМ.
