Нов минофрлачки напад извршен е денес на Амбасадата на Русија во Дамаск, соопшти руското Министерство за надворешни работи.
Како што се наведува во соопштението, една граната експлодирала во дворот на Амбасадата и предизвикала „незначителна материјална штета“.
Ова е втор минофрлачки напад на Амбасадата во последните два дена.
Во средата паднаа две гранати, но една не експлодира.
Русија е главен сојузник на сирискиот претседател Башар ел Асад кој од 2011 година се бори со бунтовниците.
Портпаролката на руското Министерство за надворешни работи Марија Захарова изјави дека гранатата истрелана од бунтовнички кварт во Дамаск, паднала недалеку од влезот во конзулатот.
Захарова нападот го поврзува со постигнувањето на примирје на територијата на цела Сирија, кое денес го објави рускиот претседател Владимир Путин.
