Со посна трпеза во центарот на градот, со благослов и желби за заедништво и традицијата да продолжи, прилепчани и нивните гости го прославија по 14-ти пат, организирано, својот патрон, Свети Никола. Трпезата со речиси 70.000 мали посни сарми што ги приготвија 55 жени од четири прилепски здруженија, со риба, посен војнички грав, со малсиники и во добро расположение ги поттикна прилепчани да ги упатат пораките за диобра мисла, за заедништво, здравје и среќа.
По утринската света литургија која се одржа во прилепската црква „Свето Благовештение“ со која началствуваше митрополитот Петар, а присуствуваа архиепископот г.г. Стефан и владиката Климент, благословите беа упатени од параклисот, посветен на Свети Никола во центарот на Прилеп.
Годинашниве домаќини, семејството Небрежанец упатија пораки за среќа и радост и задоволството што токму тие се домаќини на прославата на градската слава.
– Гордост и чест е да се биде домаќин на најголемата прилепска слава, Свети Никола, особено значајна за градот, рече Кирил Небрежанец.
Бисера Небрежанец пак посочи дека чест и е што потекнува од семејство што ги почитува верата и традицијата. – Свети Никола е чудотворец и заштитник на Пирлеп. Ние сите во Прилеп ја почитуваме традицијата која сакам уште многу години да се негува зашто е синоним на слободарскиот дух и почитувањето на вредностите, рече таа.
Митрополитот Петар нагласи дека чудотворецот Николај е многу почитуван во Прилеп.
– Голем број прилепски семејства ја имаат домашната слава Свети Никола, голем број слават и именден и тоа го заслужува чудотворецот Николај, заштитник на морепловците, на сиромашните, на децата и на граѓаните кој правел многу добри дела, рече владиката Петар, кој смета дека треба да се чува духовното богатство.
За прилепскиот градоначалник Илија Јованоски, битни се пораките што се упатуваат на овој празник.
– Овој празник, кој се одбележува со традиционалните христијански обичаи, со убавата посна трпеза, со дружење, песна, пречекување гости, нѐ потсетува на важноста на почитувањето, заедништвото и сплотеноста и убавината во негувањето на убавата и позната прилепска традиција и на културата. Убавата мисла, хуманоста, солидарноста, посветеноста, слогата, почитувањето, добрососедските односи, убавиот муабет и дружењата да бидат вреднсоти кои ќе не водат во Новата Година, рече Јованоски.
Нови домаќини на прославата на градската слава в година се семејствата Тарунџиоски и Качкиноски, сопственици на прилепската фирма „Футура“.
Сегашните и идните домаќини на подарок од Општината добија икони.
ИЗВОР: МИА
