Министерот за финанси Драган Тевдовски најави дека до крајот на годината ќе има промени во буџетското планирање за што ќе бил подготвен нов предлог-закон за реформи во овој дел.
„Јавниот долг изнесува 4,7 милијарди евра и потребно е да се промени среднорочното буџетско планирање. Ќе направиме промени во буџетската рамка со предлог-закон за реформи“, изјави министерот Тевдовски.
Тој вели дека е подготвена и предлог-стратегија во која има серија мерки со кои ќе се постават алатки за кредибилно управување со јавниот долг. Тоа, како што напомена, е во склад со препораките на Светска банка и на Европската комисија, како македонски стратегиски партнери.
Стратегијата, посочи Тевдовски, е на среден рок, за периодот од 2018 до 2021 година, за управување со јавни финансии, со што се зафаќа и делот на јавниот долг.
Според министерот, во стратегијата прво е потребно да се смени среднорочното буџетско полнење.
„До крајот на годината планираме да излеземе со промена на буџетската рамка. Во моментов во Министерството за финансии заедно со Финска работиме на еден проект кој треба да ни донесе предлог на закон со кој точно ќе се утврди што да направиме и каде ќе се движат реформите“, посочи Тевдовски и додаде дека како земја мора да мислиме на среден рок и подалеку доколку сакаме да имаме успех.
Во стратегијата, вели, имало седум приоритети, а еден од главните била транспарентноста, на што било посочено и од страна на Светска банка. Меѓу алатките било и формирањето фискален совет, кој бил само еден од механизмите што ќе правеле еден вид анализа и контрола.
„Ако сакаме во Македонија да имаме кредибилни јавни финансии, треба да го подобриме процесот на транспарентност, да се подобри проекцијата на буџетските приходи и расходи, да се мисли на среден рок и да се постават некои механизми“, дециден е Тевдовски.
