Владина делегација предводена од премиерот Зоран Заев денеска оствари средба со бугарскиот премиер Бојко Борисов и со претседателот Румен Радев во рамки на дводневната официјална посета на Република Бугарија. На средбите во бугарската престолнина ќе се побара од Бугарија како иден претседавач со ЕУ поддршка на патот за членство на Македонија во Унијата и во НАТО, како и унапредување на соработката меѓу двете земји.
Софија по Брисел е втората дестинација што ја посетува премиерот Заев по формирањето на новата македонска Влада.
Премиерите на Македонија и Бугарија, Зоран Заев и Бојко Борисов, на денешната средба во Софија се заложија историјата да не ги разделува двата народа, туку да ги зближи. Во тој дух, на средбата паднал договор двете земји оваа година заеднички да го прослават Илинден, 2 Август. Во таа пригода, на покана на Заев, можно е Борисов да дојде во Македонија.
Било разговарано и за тоа во Софија да се именува улица по името на покојниот претседател на Македонија, Борис Трајковски, додека во Скопје да се именува улица по поранешниот бугарски претседател Жељу Желев, една од најзаслужните личности за меѓународното признавање на нашата земја.
Заев на средбата побарал Бугарија да ѝ помогне на Македонија и да го пренесе своето искуство во реализацијата на проектите и реформите што треба да се исполнат. Македонскиот премиер најавил дека ќе биде потпишан и договорот за добрососедство, кој долги години беше камен на сопнување во односите меѓу двете земји.
„Разговаравме, ги приближивме ставовите кон потпишување на договор за добрососедство, ни остана уште многу малку. Заедно ќе го прославиме Илинден во Македонија на 2 Август. Се согласивме тогаш да го потпишеме договорот за соработка меѓу нашите две земји. Премиерот Борисов ќе ја посети Македонија и ќе се поклони пред споменикот на нашата историја. Ние денеска ќе се поклониме пред споменикот на цар Самуил во Софија“, изјави Заев по средбата со неговиот бугарски колега.
Борисов, пак, порача дека ќе разговара со своите колеги во Бирсел за пристапот на Балканот во ЕУ.
„Ние сме за единствена Македонија, членка на НАТО и на ЕУ“, рече Борисов.
Премиерот на Бугарија Бојко Борисов и неговиот македонски колега Зоран Заев, денеска заеднички положија цвеќе на споменикот на Цар Самoил во Софија.
