Вкупниот прилив на странски директни инвестиции во првите шест месеци од оваа година изнесувал 273,8 милиони евра, додека истовремено од земјата се одлеале 53,8 милиони евра, покажуваат прелиминарните податоци на Централната банка на Црна Гора.
Нето приливот на странски директни инвестиции, односно разликата меѓу нивниот прилив и одлив, во првите шест месеци изнесувал 220 милиони евра и е за 41,7 отсто повеќе отколку во истиот период лани.
„Од земјата по основ на вложувања на резиденти во странство се одлеале 11,9 милиони евра, додека повлекување на средства на нерезеденти инвестирани во Црна Гора има 41,9 милиони евра“, се наведува во извештајот на Централната банка.
Приливот на странски директни инвестиции во форма на сопственички вложувања изнесувал 163 милиони евра, што сочинува 59,5 отсто од вкупниот прилив. Од тоа, во недвижности се вложени 72,2 милиони евра, а во фирми и банки 90,8 милиони евра.
Приливот на странски директни инвестиции во форма на интеркомпаниски долг изнесувал 108,6 милиони евра или 39,7 отсто од вкупниот прилив.
